सॉरी

सॉरी

सॉरीचा अर्थ पाहिला तर

"सॉरी"ला वाईट वाटत असते

त्याची आगतिकता त्यातून

पूर्णपणे दिसतच असते १



माफी किती सोपी असते

सॉरी म्हणून काम भागते

हल्लीच्या या आधुनिकतेत

सॉरीने सर्व जमून जाते २



म्हणणारा पटकन म्हणून जातो

ऐकणारा संभ्रमात पडलेला असतो

"सॉरी"चा कधीच तोटा नसतो

झेलणारा मात्र आगतिक होतो ३



"सॉरी"ने सॉरी म्हटल्या म्हटल्या

ऐकणाराच खरं तर सॉरी झाला

सॉरी म्हणणारा मात्र काठावरून

ऐकणार्‍याच्या गटांगळ्या पहात राहिला ४



स्कूटरवाल्याने धक्का दिला

तो, सॉरी म्हणत निघून गेला

धक्का खाणारा हताश होऊन

कुठे लागलय ते शोधत राहिला ५



सौ. कोमात गेलेली होती

काळ थांबून राहिला होता

पांढरा कोटवाला शांतपणे

पडद्याकडे बघत राहिला होता ६



अखेर सौ.ची लढाई संपली

पांढरा कोट सॉरी म्हणाला

हे ऐकले आणि, यमदूत मात्र

खदा खदा हसत राहिला ७



मनात हसत म्हणत राहिला

सॉरी म्हणणारा हुशार आहे

आणि ते ऐकणारा खरोखर

किती किती बिनडोक आहे ८



दोघानाही हे माहित आहे कां?

गोष्टी कुणाच्या हातात आहेत?

दोघेही कळसूत्री बाहुल्यांसारखे

नियतीच्या तालावर नाचत आहेत? ९



सॉरी म्हणणार्‍याला नेहमी

खरच सॉरी वाटते का?

ज्याला सॉरी वाटत असते

तो सॉरी सॉरी म्हणत राहतो का? १०





..........श्रीराम पेंडसे